MNF-in AMC inthlan-ah lawmthu an sawi. Vote tla tlem erawh pawi an ti.
Vawiin Ni 22.4.2026(nilaini) khan MNF Party chuan thuchhuah simin, Aizawl Municipal Corporation Inthlan 2026 chu tluang takin neih zawh alo ni ta a. Mipui chanvo duhthlanna lantir a, Vote thlak zawng zawngte chungah lawmthu an sawi a, Duhsakna nena MNF Candidate lo Vote tute chungah thinlung takin lawmthu an sawi bawk.
MNF thuchhuah chun, MNF candidate te tana theihtawp lo chhuahtu party mipui leh neutral atanga thahnem min ngaihpuitu, Aizawl chhung leh pawna tha thlah hauh lova thawktute chungah pawh kan lawm takzet a ni, an ti a. Hah taka Inthlanna buaipuitu thawktute chungah lawmthu kan sawi a, Inthlana Vote tla tlem erawh a pawi kan tiin, democracy rama mipuiin kan duhna kan lantirna kawnga thawkchhuak kan tlem hi Inthlanna buaipuitu sorkar hlawhchhamna kawng khatah kan ngai a. Mipui hriat tur puanzarna leh inzirtirna kawnga tih tur tih tawkloh vangah kan ngai a ni, an ti.
MNF chuan, Vote nei tura inngai, AMC E-Roll 2026-a awmlo, Vote thlak tura kal hawihai ta engemawzat awmte chu pawi an tih thu sawiin, 61.14% chauh Vote thlak kan ni hian abak vote thlaklo 38.86% te duhthlanna ai a awh dawn tihna a ni a, a huapkim tawklo hle in kan hria a. Vote thlaktute zinga 50% chung lamte thlanchhuah chauhin kan Aizawl khawpui enkawl hna hi an thawk dawn tihna a ni a, duhthusamin a kal a kimlo hle ah MNF chuan kan ngai a ni, an ti bawk.
Venhimna lam thawktu, State danga duty mek mi tamtak vote thlak thei lova siam an ni chu pawi an tih thu sawiin, MNF chua, rim taka kan ram himna atana thawktute dikna chanvo rahbehna leh Democracy kalphung zahlohna ah kan ngai tlat a, hetiang hi thleng nawn tawhlo se kan duh takzet a ni, an ti a. Tluang tak leh him takin Vote chhiar a nih ngei kan beisei a, Vote tla chhe tak karah Pathian leh mipui duhsakna changin sokarna siam ngei kan inbeisei a. Mipuite lalna leh zalenna AMC din a nih ngei kan beisei tlat a ni, an ti bawk.
