MNF Kuhmum-ah ZPM an Par. Er. K. Lalsawmvela
Vawiin-a Mizo Hnam Run chhung inkhawm-ah MNF General Secretary Er.K.Lalsawmvela chuan thu sawiin, tuna kan sorkar hrawn mek hi sawichhiat thiam lama doctorate degree nei, thawh lamah erawh third class an nih thu sawiin, Congress leh MNF kum 37 sorkar kha engmah thawk lo anga mipuiah zirtirtu, sorkar hmasate thawhchhuah sa ring ringawt, danglam bik leh tha bik tur anga mipuiah in zuarin, 'enchhin sorkar' an ni a. Mipui hip nan an tih theih loh tur intiamin, 'kan ti ve lovang' an tih zawng zawng ti leh si a, mipuiin anmahniah rinna an hloh mek a ni, a ti.
Er.K.Lalsawmvela chuan, "Aizawl Bypass, Sihhmui atanga Tlawng kama kala Muallungthu a chhuak tur chu MNF sorkar sawichhuah, a hranpa ngata Union budget kum 2022-a lo lang, PM-Devine atanga cheng vbc 500 leh Bamboo Link Road Pilot Project atana cheng vbc 100 dah a ni, a ti a. Scheme thar anih avangin Guide Line siam chhung, pawmpuitu chhawng tam vang leh a tlawh tur ram tihfel hmasak ngai avangin sanction a tlai ta a. ZPM chu MNF kuhmum-ah a par ta a, tuna thawh mek a ni hi a lawmawm khawp mai, a ti.
Pu Sawmvela chuan, "PMGSY, thingtlang khua zawng zawng pawh tura scheme hi thawh hnihna thleng zawh a ni tawh a, tunah hian a thawh thumna (phase III) thawh mek a ni a. He phase III hi 2020-'21 daih atanga bul tan tawh niin, central lamin an duh khirh avang leh kaihruaina an siam anga kal a ngaih avangin MNF sorkar tawp lamah sanction a lo chhuak ta chauh a. A vaiin kawng 17 thlan bik km 487.50 atan cheng vbc santion a ni a, tunah thawh mek a ni, a ti a. Hei pawh hi tute emaw chuan an sawi chhuah, an bial tana an nawr vak avanga tel ta anga sawiin hming that lak an tum a ni awm e, a ti a. ZPM sorkar hmaa sanction vek a ni tih beng nei chuan i hre mawlh ang u," a ti bawk.
