Central-a Congress Party dinhmun a phet, MNF leh ZPM puipate rilru a mangang hle. Dr. K. Beichhua
Nimin khan BJP Mizoram chuan karthar inhlanna leh political session neiin, State President Dr. K. Beichhua MLA chuan "Vawiin-ah hian BJP Member-te hi Politics-a kan dinhmun hi a nghet hle a ni tih kan hriat a ngai a, Congress Party kan hria a, Central-a an ṭan hmun a phet mek a. Party dang Regional Party MNF leh ZPM-te pawh an ṭan hmun hi a nghet tak tak thei lova, mahni kea ding thei kan nih loh avangin an dinhmun hi a lang-ah a ṭhain lang mahse an puipate rilru erawh a mangang hle ṭhin a ni," a ti.
Dr. K. Beichhua chuan, "vawiina BJP rawn zawm thar ṭha tak tak kan nei hi a lawmawm hle a, BJP nihna dik tak hi Mizoram mipuiin kan hmu zel dawn a, Development Party kan nih angin, kan tum ber chu Hmasawnna thlen a nih laiin Congress Party hruaitu ṭhenkhatte'n Development Policy sawi tur an nei ve lo a, BJP chu Hindu Party tia beiin an buai laih laih a ni, Mizoram ṭhalai tam tak te leh nu leh pa te chuan BJP nih phung leh hmalakna te a taka an hmuh leh an chan mek avangin bum theih loh tam tak an awm tawh a, hei vang hian BJP hma lam hun a êng hle tih a ti chiang a ni," a ti.
Dr. K. Beichhua chuan sawi chhunzawmin, "Mizoram ah BJP hi nakin lawk ah chuan Pathian zarah kan sorkar ngei ngei dawn a, BJP ni lo thei lo dinhmun ah kan la awm dawn a ni. A chhan chu, Mizoram hi mahni kea ding thei leh awm thei kan ni lova, intodelh lo tan a huaisen theih tak tak theih loh avangin, nakin lawkah chuan kan mamawh engkim mai min petute hnenah hian ngaihdam kan la dil ang a, Central hruaitute hnenah tunah chuan BJP angin kan lo ding chhuak ve tawh dawn e tiin kan la sawi dawn a ni. Chuvangin, vawiina BJP-a kan lo awm hi kan tisual lo a ni tih ka sawi duh a, Pathian zar ah kan hmabak a êng zel dawn a, future bright ber chu BJP kan ni," a ti bawk.
