Vawiin Ni 20. 1. 2026 khan MNF Sub.Hqrs Lunglei Vigilance Department chuan Civil Hospital Lunglei tlawhin, sorkar hma lak dan hrang hrangte an en fiah.
MNF Sub.Hqrs Lunglei thuchhuah tarlan danin, sorkar liam ta, MNF sorkarin mipuite mamawhna hria-a Lunglei Civil Hospital-ah hian Oxygen Plant lian 800ppm (Vellore Hospital-a mi tiat) dam lo, oxygen mamawhte’n an hip theih nan ward zawng zawnga khum zawng zawng a thlun zawm vek tawh chu tun din hmunah a khawl a that loh avangin hman (function) theih lohin a awm mek niin an sawi a. Tun hma lama oxygen cylinder, phai (Silchar) leh Aizawl atangtea lak chawp ngai thin chu MNF sorkar khan ti bovin, Lunglei hmunah (Pukpui)-ah oxygen siam chhuahna hmun a din a, an ti.
MNF Sub.Hqrs Lunglei chuan, Civil Hospital-a dam lo, a mamawhtute’n awlsam taka oxygen an hip theih nan khum tin thleng veka oxygen pipe line-a zam chhuah vek an dah fel vek tawh chu kan sorkar hian a ngaihthah avangin, tunah chuan he oxygen pek chhuahna khawl hi a chhiat avangin hman theih lohin a awm ta hi pawi kan ti a, dam lo (mipui) hmakhua ngaihna leh oxygen mawhtute’n rang taka oxygen an hmuh/hip zung zung theih nan a rang thei ang bera siam tha a, function-tir thuai turin sorkar kan ngen a ni, a n ti.
MNF Sub.Hqrs Lunglei chuan, Civil Hospital-ah hian dam lote mamawh em em Syringe Pump an indaih lo hle niin an sawi bawk a, tunah hian syringe pump hi 6 nei mekin, heng zinga 3 chauh function thei a awm te hi kan sorkar hian ngaihven rang se kan ti a ni, an ti a. Dam lote din hmun an mar phu, BP, respiration, temperature, SPO-II leh thil dang enna monitor function thei lo a awm nual te hi a pawi hle a, hei bakah hian Lunglei Civil Hospital-a thawktu indaih lo lutuk te hi Health Minister hian a hre lo nge a hai der tih an zawt bawk.
Mizoram chhim biala hospital lian berah hian tun din hmunah department tinah doctor pakhat chauh awm ang an ni te chu thuam that a ngai hle niin MNF Sub.Hqrs Lunglei chuan an sawi a. Naupang doctor (Pediatrician) pakhat chauh mai hospital liana a awm te hi sorkar tan chuan a mualphothlak a, pediatrician doctor dang pakhat tal Lunglei Civil Hospital hian an neih belh a ngai ni a sawii, a rang lama dah belh ngei turin sorkar an ngen bawk.
