MNF Thalai chuan Dawt Do Project kan kalpui. Kan hma lawkah hian dawt pachal hlir halna kan nei leh dawn. RRR-a
Inrinni tuk khan MNF Thalai chuan Aizawl Tennis Court bulah kawtlai campaign neiin, MNF Thalai President Robert Romawia Royte MLA chuan, CM Lalduhoma hian State Capital Aizawl khawpui hi Thenzawl-a suan a duh thu leh chumi atan chuan sum a dil nghal thu a sawi.
Robert Romawia chuan, NGOs te leh Kohhrante thlenga rawnna tur chi, State Capital Aizawl atanga Thenzawl-a suan tura hmalakna hi, Aizawl mipuite tan a huatthla awm hle a ni, a ti a. Chubak-ah, ZPM President Lalliansawta pawhin state rorelna sangber Assembly House pawh zokhaw lama suan an tum thu te, ZPM MLA Lalmuanpuia Punte pawhin Assembly Session-ah Aizawl khawpuiah thil thar dah belh tawh loh a duh thu a sawi thu te a sawi a. Hetiang-a Aizawl khawpui (Capital) nihna te suan duh leh dah hniam tumtu ZPM party te hi AMC a rorel tlak an nilo a ti, a ti bawk.
MNYF President chuan ZPM sorkar chu Mizorama sorkar awm tawh zawng zawnga eiru nasa ber tia koh ngam, duhsak zawngte vulh nana dan dinglai tam tak pawngsual duh tu sorkar a ni tiin, an chet dan dik lo lutuk te hi central sorkar atanga sum rawn petute beng a thleng tan mek a ni, a ti a. SASCI sum leh AMC leh LMC sum tih lapse teuh teuh mai te khi a pawi hle a, sum leng vel tlemna chhan te zinga mi pakhat pawh hi an sum hmuh chhun te a lapse teuh teuh vang a ni, a ti bawk.
MNP Thalai President chuan, MNF Thalai chuan dawt do project kan kalpui a, kan hma lawkah pawh hian dawt pachal hlir halna kan nei leh dawn a ni a ti bawk.
