Mipuite ngenna avangin MUHCS Registration tih hun May ni 15, 2026 thleng pawh sei a ni. Health Minister
Vawiin 14th April 2026 hian Aizawl hmun hrang harang-ah ZPM Thalai General Headquarters buatsaihin Street Campaign neih leh a ni a. Edenthar, Zuangtui, Chaltlang,Ramthar North, RSC Field, Chanmari leh Zemabawk-ah te an nei a. He hunah hian Bial tina Ward Candidate leh Minister Lalrinpuii, B.Lalchhanzova leh Lalnghinglova Hmar bakah Jeje Lalpekhlua.MLA ZPM Thalai Gen Headquarters President leh Lalhruaitluangi Sailo LMC Member Lunglei ten thusawina an nei.
Health Minister Lalrinpuii chuan "ZPM in sorkarna kan chan atangin theih tawp chhuahin Health lamah hma kan la a. Kan sorkar hi mipuite nat rual a na ve thin kan nih angin, Mizoram Universal Health Care Scheme pawh Mipuite thlamuanna khawp pe thei turin kan siam chhuak ta a ni, a ti a. Sorkar hnathawk awm lohna chhungkaw tan pawh thlaphanna awm tawh lohna tur Health Care Scheme kan nei tawh a ni, a ti.
Health Minister chuan, tun hnaiah party pakhat a an hotu chuan thidiklo a mipuite chaih kawi tumin, 'Mizoram-a Pvt Hospital-te phailam Hospital nena inremna aia hniama an tih theih thu an hrilh pawhin an phal lo tih thu a sawi a. Thudik hi Mipuiten hria se ka duh a, thudiklo vawrh tute hi mipuiten ngaihdan tawk i nei ang u. Pvt Hospital-te nen hian ṭum engemaw zat indawr a ni a. Hospital mal leh pawl NGHAM ang pawn Minister hote, Secy & Commsr hote, CEO te nen pawh sawiho fo a ni a. Tun hnai chhoah Hospital tinte CEO office ah leng tura sawm an ni a, rate chungchang pawh sawipui an ni a. MUHCS kalphung hi Package system a ni a, Pvt hospital lam hian an rate ang ang atanga 10% a hniamin min offer a, mahse chu chu Package system a nih loh avangin package system turin lo siam tha leh ru kan ti a, hei hi a chhanna kan nghak mek a, phai rate leh Mizoram rate hi kan khaikhin fo a, Pvt Hospital ten lo hrethiam se, anni nen chuan Specialities-ah te, Super Specialities-ah te, kan facilities neihte a inthlau em a, an rate aia hniam tih pawh hi eng ang taka hniam nge tih sawi chian awm lo, a ti bawk.
Health Minister chuan, Mizoram sorkar hian tun ah hian bill a neih ang ang chu a clear zel a. Thawktu lam indaih lohna avang a process lai mek pawh a awm ang, sorkar hian bill pek tur hi a nei a, thlaphanna tur a awm lo a ni tih ka sawi duh bawk a. MUHCS hi scheme lang tlang a ni a, Empanelled list, bill pek tawh zat, Guidelines, Circular leh Notification etc. zawng zawngte State Healthcare Society Website lamah a duh apiang tan en theiha dah chhuah a ni a. Mass media leh Social media lamah Bill pek dan te,
Scheme tana pawisa lut leh chhuak te lang tlang taka tarlan thin a ni, a ti bawk a. Health Minister chuan mipuite ngenna avangin MUHCS Registration tih hun chu May ni 15, 2026 thleng pawh sei a nih thu a puang bawk.
