Brigade Field-a in tual vuak tum ni awm-a party pahnih ten thu leh hla an neih mek lai hian, Aizawl khawpui enkawl tur thlan kawngah mipui ten ngaihtuahna fim tak hmang ang u. Rosiamngheta, Ex-Corporator AMC
Vawiin khan AMC Ex-Corporator Rosiamngheta chuan Aizawl Press Club-ah thuthar lakhawmtute kawmin, kan hma lawkah Aizawl khawpui enkawltu tur AMC Corporator kan thlang dawn a. Brigade Field a in tual vuak tum ni awm fahran a MNF leh ZPM Party ten thu leh hla an neih tawn mek lai hian, Aizawl khawpui enkawl tur kan thlanna turah Aizawl mipuite hian ngaihtuahna fim tak hmangin vote i thlak ang u tiin, Congress Party chuan Aizawl mipuite kan ngen a ni, a ti bawk.
Rosiamngheta chuan, Municipal hi mahni ro in rel a ni, MLA emaw Minister emaw pawhin zuk sawi theih an nei lo. Entirnan: lirthei dahna tur atana AMC in parking area a rin a a pass tawh ah chuan, State sorkar thuneitute emaw MLA leh Minister te emaw in AMC Parking Area kha Car pakhat leng tur pawhin an ti zimin an tizau ve thiang tawh lo. Chuvangin thenkhat phei chuan Local Self -Government mai pawh ti lo in Mini City Government an lo ti hial bawk a ni, a ti.
Municipal hi state sorkarin an duh duh a an tihkual theih a ni lo tiin, Municipal hi mahni a thuneihna nei, mahni a ro inrel liau liau a ni a. India ram Finance Commission atanga budget hran mumal taka nei thlap a nih avangin, Municipal in amah leh amah a in enkawlna tur pawisa pawh Finance Commision in a pe thin a. Chu a pawisa dawn tur chu state sorkarin ni 10 ral hmaa AMC hnena a pekchhuah loh phei chuan state sorkarin a pekchhuah tlai vanga hramna pawisa pung nen lam a pe hial zawk thin a ni, a ti a.
Rosiamngheta chuan, Vawk leh Ar vulh khawpna dan kan ennawn ang tiin, MNF kaihhruai AMC sorkarin Aizawl khawpui chhunga ran vulh khap tlatna dan a lo siam hi zangkhai zawk leh awmze nei zawka hman anih theih nan kan ennawn dawn a ni. Aizawl khawpui ah hian a veng azirin ran vulh remchanna hmun tam tak a la awm tih Congress party chuan hria in, AMC area zawng zawnga ran vulh khap burna dan khauh tak hi mipuite tana tangkai turin kan siamtha dawn a ni, a ti.
Aizawl khawpui hmasawn leh timawi turin hma an lak tur thu sawiin, tawn hriat nei kan candidate-ten ngaihtuahna fim hmanga thutlukna dik siamna hmun tur a ni, chutiang anga rorel tur chuan Congress Party-te chuan milar emaw ngawt kan zawng lova, rorelna tha thlen tura rorelna hmuna tawnhriat nei tha kan chhawp chhuak a ni, a ti bawk.
