PM Modi-a'n District puih ngai zual 100 a thlan chhuah leh zingah Mamit District kan telh
BJP Mizoram chuan vawiin khan karthar inhlanna leh political session an nei a, State President Dr. K. Beichhua chuan thu sawiin, Dampa Bial dinhmun thlirin BJP chuan nasa takin hma kan sawn tih kan hriatin, bial mipuite chungah lawmthu kan sawi tak meuh meuh a ni, a ti.
Dr. Beichhua chuan, Dampa Bial tan, Dampa Bial hmasawnna turin BJP Mizoram chuan nasa takin ngaihtuahna kan siam tawh a, Manifesto-a kan ziah piah lamah pawh Dampa Bial mamawh hrang hrangte Central-a kan hotu te'n min hriatsak tawh a, Aspirational District an nih mai bakah, tun hnaiah PM Modi-a'n District puih ngai zual 100 a thlan chhuah leh zingah Mamit District kan tel leh a, heng District tana ruahmanna a siam te hi, District hmelhmang danglam dawrh theihna tur khawpa tam sum ruahman a ni a, chung hmang te chuan Dampa Bial mai nilovin, Mamit District pum pui tan pawh a chhenfakawm hmasawnna kan hmuh na tur a ni tih hi Dampa Bial mipuite'n kan hriat a, BJP Official Candidate Lalhmingthanga lo vote ṭheuh turin in khawngaihna kan rawn dil a ni, a ti bawk.
Palak bialtu MLA K. Hrahmo pawh in thu sawiin, Dampa bial by-election campaign-a thusawi lar êm êm pakhat chu, Aspirational District an nih vanga MLA thlan tlin an nih chuan chumi hmanga Development an hmuhna tur sawi chhuah sak te a ni a, Kum 2018 ah MNF an Sorkar a, tuna MNF Official Candidate Thangtea pawh hi khang hun lai khan Minister ni tawh in, Mamit District hi Aspirational District a lo ni bawk a, khang hunlai khan ngaihsak an hlawh ngai lem lo a ni. ZPM pawh kum 2 an Sorkar mek a, Aspirational District tan a hma an lak hmuh tur a awm chuang lo a. Tun a taka hmangaih ber anga an in lan leh hi Dampa mipuite tana fimkhur ngaih lai tak a ni a, Aspirational District tana Central Sorkarin sum a dah la chhuak tur hian tu MLA nge ṭha ber ang tih hi Dampa Bial mipui ten kan ngaihtuah chian hle a ngai a ni,a ti bawk.
