Rem leh rem lova politics, sakhuana nena chawhpawlh luih tum ṭhin te hian kan ram an tichhe mek. BJP State VP
BJP Mizoram chuan vawiin April Ni 6, 2026 (Monday) khan karthar inhlanna leh BJP Foundation Day lawmna hun hmangin, State Vice President Vanupa Zathang IPS (Retd)-in thu a sawi a. "BJP hi Kum 46 chauh niin, ṭhalai tak a ni a, chuvangin ṭhalai ta a tih theih hial a ni, a ti.
Vanupa Zathang chuan, "BJP hi Kum 46 chauh niin, ṭhalai tak a ni a, chuvangin ṭhalai ta a tih theih hial a ni. Pawl reng renga kan awm dawnin, kan awmna pawl din chhan leh a din dan kan hriat hmasak a ngai a, chuvangin thil hriatchian hmasak hi kan ngaih pawimawh a ngai a, kan awmna pawl kalphung kan hriatchian loh chuan kan kal buai nuai thei a, harsatna kan tâwk ṭhin a ni," a ti.
Vanupa chuan, "BJP lo din chhuah dan ngaihtuah hian a dintute khan India ram an hmangaih zia a hriat theih a, BJP hming a putna tura kawng sâttute hi an fakawm hle a ni. Kum 1952 aṭanga rawn inmung chhovin, kum 1980 ah Bharatiya Janata Party (BJP) India Mipui Pawl tih a lo ni ta a, Central-a BJP lo lian zel tur chu Congress Party-in an hmuh lawk avangin kawng hrang hrangin an do a, Mizoram ah pawh kan insawiṭhaih nasa a, Congress Party-te'n an sawisel nasat avangin BJP hming awmzia kan hriat hma hauhvin, kan lo hlau ringawt tawh mai ṭhin a ni," a ti.
BJP State Vice President chuan, "BJP hruaitu ah hian Ram hmangaih avanga mahni in leh lo te, nupui fanau te leh mahni chhungte aia Ram hmangaih thlan vanga inpe hruaitu an nih hlawm avangin, BJP kaihhruai Sorkar a pian hnuah Development nasa takin India ram ah a thleng a, tunah phei chuan Pu Modi-a kaihhruai sorkar term 3-na kal mekin kawng engkimah khawvel mit fûkna kan lo ni ve thei ta a. Politics hi rem leh rem lova, sakhuana nena chawhpawlh luih tum ṭhin te hian kan ram hi an tichhe mek a, BJP beihna tur an hriat tawh loh avangin dâwt hmangin mipui rilru an sûk sak ṭhin a. Chung mite chuan ram an hmangaih ngai lova, an mahni leh an chhungte tan leh an ṭangkai pui theih tur mi te tana an sorkar ṭhin avangin kan ram pawh hian hma a sawn hleithei lo a ni, a ti bawk.
He inkhawm-ah hian BJP State President Dr. K. Beichhua chuan '47th BJP Foundation Day' lawm nan BJP Flag a pawt pharh a ni.
