Vawiin ni 23, 2026 (Zirtawpni)-a Mizo Hnamrun chhung inkhawm-ah, Rajya Sabha MP K. Vanlalvena chuan Sihphir leh Lengpui airport chhehvel ram hmanhmawh taka lei anih chungchang sawiin, Rajya Sabha MP chuan, "India Defence ministry in mimal kut atangin ram a lei lova. Mizoram sorkar kut atangin IAF in ram a lei a ni zawk. India ram bungkhata awm kan nih avangin central sorkar hmalakna hrang hrang; railways, kawngpui sial leh a dangah pawh hmalakna a awm dawnin, state sorkarin NOC a pek angai thin a. Hei hi thil kalphung a ni," a ti.
Rajya Sabha MP chuan, Party office hi dawt sawina hmun tur a ni lova, thu belhchian dawllo hmanga mipui rilru hruaisualna hmun tur a ni heklo. ZPM MLA pakhatin, Sihphir leh Lengpui chhehvel ram lei chungchang sorkarin a hriatpui lova, DC levela tihfel anih thu a sawi kha thudiklo a ni. 15, May 2025 ah sorkarin heng ram Lengpui leh Sihphir amite hi arukin Award for Acquisition a chhuah vek a, chuvangin ZPM sorkar hian midang a puh thianglo. Lok Sabha MP nilai hi Parliament standing committee on Defence ah member anih avangin a hriat ve ngei tur niin a lang a. A hrelo anih chuan a lungawiloh hle a rinawm a ti bawk.
Rajya Sabha MP chuan, sorkar hmalakna hi minister handwriting hmanga ziak a ni ngailova, sorkar officer te hminga ziak a ni thin. Act 213 hmangin sorkarin ram a lei thin a, dan anga chanchinbua chhuah tur anih laiin ram neitu diktak ten an hreve miah silo hi a mak a. Thildiklo inphum a awm ngei tih leh dan bawhchhiatna a awm tih a chiang a. Thudik hailang turin theihtawp ka chhuah dawn a, a hreturten an hriat ngei theihnan ka aupui dawn a ni. Sorkar chetchhiatnaah hian kan lawm a nilova, kan kawng Pathianin min ruatsak zel avangin kan lawm a ni, Pu K. Vena chuan, a ti bawk.
