ZPM Thalai in ram hmasawnna hna thawh theihna tura CM hmalakna chu a lawmawmawmin a thlamuanthlak an ti.
Vawiin khan ZPM Thalai chuan thuchhuah siamin, Zan hnih riaka New Delhi-a zin, Chief Minister, Pu Lalduhoma chuan, New Delhi-a a cham chhungin Parliamentary Affairs leh Minority Affairs Minister, Pu Kiren Rijiju a kawmin, Mizoram mamawh hrang hrang te sawipuiin, PMJVK hnuaia Mizoram Sawrkar projects ngaih pawimawh 23 a thehlut bawk a, heng Chief Minister in Mizoram tana a ngaih pawimawih hrang hrang a sawite hi, Union Minister hian a lo ngai thutak hle a, Chief Minister-in, sawrkar project a thehluh tepawh a vaiin a lo pawmsak nghal a ni, an ti.
ZPM Thalai chuan, Kan Chief Minister zahawm tak Pu Lalduhoma chuan, Parliamentary Affairs leh Minority Affairs Minister, Pu Kiren Rijiju a kawm bakah, Dr. VK Paul pawh kawm zuiin, Mizoram tana thahnemngai taka a ngennate puitlinsak a, hma alo laksak thinna te avanga lawmthu hrilhin, Ginger Capital of India a Mizoram an puan avanga Mizoram Sawhthingin ram pum huap hriat a hlawh chhoh mek thu a hrilh a. Mizoram Sorkar leh NITI Aayog tang dunin Tourism Conclave an buatsaih tur chungchang leh Mizoram tana thil pawimawh dangte a sawipui nghal a. Niti Aayog leh Mizoram Sorkarin Tourism Conclave an buatsaih dun tur chungchanga hmalakna thlir dunin, May thla chawhnu lamah Delhi-ah pre-conclave meeting neih an rel zui nghal bawk a ni, an ti
Chief Minister zahawm tak, Pu Lalduhoma chuan, Union Minister of Road Transport & Highways, Pu Nitin Gadkari pawh kawmin, Mizorama National Highways leh Lei (Bridges) pawimawhte tihhmasawnna tur chi hrang hrang a sawipui bawk a. A thil thlen zawng zawng hi MoRTH hian a lo pawmsak deuh vek a ni.
Hetiang taka ram tana hmasawnna hna thawh a nih theihna tura tha leh zung tam tak leh ngaihtuahna nasa tak seng tu Pu Lalduhoma Chief Minister Mizoramin kan neih hi, ZPM Ṭhalai chuan a lawmawm kan tiin, a thlamuanthlak kan ti takzet a, ram tana a hmalak tawhna leh hmalak mêkna leh hmalak zelna tura a ruahmanna siam leh duan te hi, ZPM Ṭhalai chuan chhuanawm kan tiin kan thlawp zel dawn a ni, an ti bawk.
