ZPM auhla chu AMC tha zawk a ni. Lalduhawma
Vawiin khan ZPM chuan an Party Office-ah chhung inkhawm an nei a, ZPM Leader & Chief Minister Lalduhawma chuan thu sawiin, “Opposition kan nih laia kan lo vahvaihpui leh innghahna tam tak chu kan kutah tih theih turin a lo thleng a, Pathian thuin, “Ka thlarau zawkin le” a tih angin he sorkar-ah hian Pathian Thlarau hnathawh a thleng mek a, Assam Rifle sawnchhuah chungchangah te leh Territorial Army din tur chungchangah pawh Zerubabela hunlai ang mai khan thlarau hnathawh a lo thleng mai a ni,” tiin ram pum huap tlawmngai pawl (MZP, MTF etc.)-a nihna pawimawh tak tak chelh leh party hrang hrang atangin ZPM zawm thar mi 15 a lawmlut bawk.
Lalduhoma chuan, “Solid Waste Management Centre (SWMC), Tuiriala paihna tur siam nan AMC-in JCB 3 nei sa renga mimal JCB hawhin Rs. 1.26 crore an seng a, thil mak tak a ni. SIPMIU-in a thlawnin AMC hnenah tripper 50 leh pik up 4 a thlawnin an pe a. October, 2022-a an neih kha a kum lehah hralh an duh ta mai a. Cheng nuai 24 chuanga an neih kha cheng nuai 5 awrhin an hralh leh. Thil dik lo hi kan do tur a ni a. AMC Sports Complex, Bawngkawn chungchangah mi 16 hnena hna inpek chungchang thlengin thil dik tawk lo tam tak a awm mek niin a lang. Mizoram khawpui berah kalphung hlui kaihhruai sorkar AMC a la ding hi kalphung tharah chuan sorkar lai thawhpui thei tur AMC kan thlan ngei a ngai tawh a, AMC tha zawk tih hi kan auhla tur a ni a ti,” a ti bawk.
