Dampa bialtu MLA Dr.R.Lalthangliana, MNF Senior Vice President chuan vawiin January ni 17, 2026 (Inrinni) hian West Phaileng veng chung, New West Phaileng leh Tuahzawl khuate tlawhin, ni 3 chhungin a bial khawthlang lam khaw 20 vel a fan chhuahna a ni.
Dr. Thangtea chuan Dampa bial hi Pathianin amah a dahna hmun ani tih a hriat chian zual thu a sawi a, MLA anih takah chuan party pakhat chauh MLA ni lo, mipui MLA, mi zawng zawng ta anih tawh thu a sawi. Helai bialah hian kut hnathawka eizawng deuh vek kan ni a, eng hi enge kan eizawnna tur atan tha ber tur leh inchawikanna atan tha ber ang tih bialtu MLA ho hian uluk takin an sawiho a ni.
Dr.R.Lalthangliana chuan Mizoram politics inlumlet dan chu danglam chak a tih thu sawiin, "Tuna sorkar mek ZPM hian campaign lai khan an rilrua awm, tha tura an ngaih a piang thil tam tak mipui min tiam a, hneh takin an tling ta a. Mahse, vawi khat mah MLA leh Minister la ni ngai reng reng lote an han Minister a, an beisei leh rin angin thil a awm thei leh si lo a, a ngaihna an hriat loh avangin an sawi ang khan an kal leh thei ta lo a. Sawi loh ang hlira an awm avangin, mipuiin anmahniah rinna an nghat zo ta meuh lo a. 'Balu chunga Ui bawk' an sawi ang maiin, inthlan a piangah an hniam zel a, an sorkar vanglai takin election a piangah an tla zawih zawih zel a ni," a ti bawk.
Dr.Thangtea chuan, "ZPM chu a tlahniam leh chhuk zawng hlirin an kal a, MNF chu a chho zawng leh hmasawnna lam panin kan kal zel thung" tiin, MNF-in rorelna a chan lai khan tihdikloh engemaw zat an nei ang tih a sawi a, mihring chu insiamtha a hmasawn zel tur kan ni a, a thalo lai kalsanin hma lam pan zel tur kan ni," a ti bawk.
