Nilaini-a thuthar thehdarhtute an kawmna-ah Mizoram Pradesh Congress Committee Spokesperson Dr. Lallianchhunga chuan ZPM sorkar chuan Dampa by-election an chak loh avang leh LADC inthlana pathumna an nih avangin AMC inthlan a hun taka neih an duhlo tih a sawi a. AMC term a ral hnu vekah buatsaih an tum chauh chu hriatthiam harsa an tih thu a sawi bawk.
Dr. Lallianchhunga chuan, AMC inthlan buatsaih tura harsatna lian tham awm an hrelo tih sawiin, term dinglai thiat a AMC enkawltu tur Administrator ruat ngai hiala inthlanna tih khawtlai chu, Democracy kalphung palzutna ah an ngai tih a sawi a. ZPM chuan tunhnai inthlan an chakloh avangin AMC inthlan chu an duh hrihlo nia an ngaih thu a sawi bawk.
Dr Lallianchhunga chuan AMC inthlan buatsaihna tur leh AMC sorkar thar din a nih theihna atana tih tur ṭul ang ang chu SEC hian a peih vek tawh a ti a. AMC term kal mek chu kumin March ni 1 ah a tawp dawn avangin State Election Commission chuan hmeichhe ward tur chu nikum 2025 May ni 30 ah a tifel tawh tih sawiin, AMC Final Electoral Roll pawh kumin Jan 7 khan tar chhuah a ni tawh a ti a, inthlan tih khawtlaina chhan an sawi chu state sorkar chinfel theih vek ani tih sawiin, AMC inthlan a hun taka an buatsaih duhlo chu mipui zahlohna ah an ngaih thu a sawi a, a rang lama inthlan buatsaih vat turin an phut tih a sawi bawk.
