Hnathawhna tur leh sum hmuh tur ti lapse luitu ZPM sorkar AMC enkawl tir tlak an ni lo. Ex-Mayor
Vawiin Ni 8 April 2026 khan AMC Ex-Mayor Lalrinenga Sailo chuan Aizawl Press Club-ah thuthar lakhawmtute kawmin, anmahni sorkarna ngei LMC hnathawhna tur sum ti lapse vek duhtu, AMC sum hmuh tur pawh ti lapse luitu ZPM sorkar hi Municipality enkawltir tlak an ni lo, a ti.
Lalrinenga Sailo chuan, Khawpuia cheng mipuite tana AMC leh LMC ten hna an thawhna tur sum Finance Commission ruahman fel vek tawh cheng Nuai 3,400 chuang zet chu ZPM sorkarin a ngaihthah vang liau liauin, central sorkar kutah a let leh (lapsed) vek a, hetiang taka Municipality ngaihthahtu leh hrek bettu ZPM hi AMC enkawltir tlak an ni lo. ZPM sorkar hian anmahni sorkarna ngei, LMC-in Lunglei khawpuia cheng mipuite hmasawnna hna a thawhna tur, Finance Commission 15-na in a ruahmansak, kum 2024-25 chhung atan Rs. 9,23,12,000/- leh 2025-26 chhunga an hmuh tur Rs. 9,46,80,000/-, a belhkhawmin Rs. 18,69,92,000/- zet chu hmang thei lova siamin, heng sumte hi central sorkarah a let (lapsed) vek a. LMC hian MNF sorkar hunlai, 2023-24 chhunga an hmuh Rs. 6,35,44,000/- bak Finance Commission sum pek hi an la dawng ve reng reng lo a, ZPM sorkar hnuaiah kum 2 chhung a zawnin an chȃn tawh a ni, a ti bawk.
Hei bakah hian AMC in Finance Commission 15-na atanga a sum hmuh tur, AMC-a MNF sorkarin lehkha pawimawh zawng zawng engkim an chinfel vek pawh, ZPM sorkar hian a tih ve tur, ‘Grant Transfer Certificate’ chu Ministry of Finance leh Ministry of Urban Affairs-ah te a huna a thawn loh avangin Rs. 15,26,60,000/- lai chu central sorkarah a let (lapsed) bawk a, LMC leh AMC ten khawpuia cheng mipuite tana hmasawnna hna an thawhna tur sum ZPM sorkarin a tih lapse belhkhawm hi Rs. 33,96,52,000/- lai a tling a. Hetiang taka anmahni sorkar siamna ngei LMC pawh ngaihthahtu leh AMC sum hmuh tur pawh Certificate pakhat lek thawn duh loh vanga ti lapse duhtu ZPM party hi khawpui enkawltir tlak an ni lo a. Mipuiten an hnawl a tul a ni Lalrinenga Sailo chuan a ti bawk.
Lalrinenga Sailo chuan, Municipality-a ZPM hlangin sorkar an siamna, Lunglei Municipal Council (LMC) ngei pawh ZPM sorkarin a enkawl dan atang hian AMC phei chu enkawltir chi an ni reng reng lo tih a chiang a. LMC hi hna thawk thei lovin an siam a, Central sorkar thupek anga, Property Tax an lak tur pawh la mumal thei lovin an siam a, 2024-25 chhunga cheng nuai 79 vel an lak khawm ve pawh a hunah an khawn loh avangin a hunah Central sorkarah an report hman lo a, Finance Commission sum ruahmansak pawh a zawnin kum 2 chhung an chȃn phah ta reng a ni, a ti.
Hetihlai hian AMC-a MNF sorkar liamta erawh kha chuan a tih tur engkim a ti fel a, lehkhapawimawh zawng zawngte pawh a tih fel vek avangin Finance Commission atanga sum lo kal pawh a dawng tha a, ZPM sorkarin a huna AMC inthlanna a buatsaih loh avang leh AMC thuneihna zawng zawng March ni 1, 2026 atanga ZPM sorkarin a laksak tak avangin 2025-26 bika Second Installment Rs. 15,26,60,000/- chu ZPM sorkarin a tih lapsed sak ta tho a, Second Installment hmu tur pawh hian AMC chuan engkim a peihfel a, ZPM sorkar zawkin ‘Grant Transfer Certificate’ chu Central sorkarah a huna a thawn duh miau loh avangin Aizawl mipuiten hmasawnna hna thawhna tur sum tam tak kan chȃn phah ta a ni.
Lalrinenga Sailo chuan, Hetiang hi thil awmdan dik tak anih laia Chief Minister berin, “AMC tan sum tam tak kan nawr chhuak” tih te, “AMC-ten an ngawih bopui veng veng a, March 18 khan kan hrechhuak chauh a, MNF AMC-te khan Aizawl an lo vei lo hle a ni” tih mipui hmaa a sawi duh maite hi chu thu dik hre reng chunga mipui bum tumna, koham taka AMC thuneihna an inpek thup tumna thil ṭha lo leh zahpuiawm tak a ni, a ti bawk.
