Vawiin khan Mizo Hnam Runah chhung inkhawm neih a ni a, MNYF President Robert Romawia Royte MLA chuan thu sawiin, ZPM sorkar hnuaiah dan bawhchhiatna a nasa em em a, kuhva tawlhruk a hluar a, fertilizer tawlhruk chungchangah pawh CM a inrawlh nia sawi a ni a. Dampa bial by-election campaign neih mekah pawh ZPM sorkar hian dan an bawhchhe nasa hle a ni. Dan bawhchhiat hi engah mah an ngai lo ni hialin a lang a, a pawi hle a ni, a ti.
Robert Romawia chuan, Dampa mipui zingah ZPM hlawkpui an awm lo a. ZPM hian buhfai man a letin an ti to a, electric bill a an ti sang nasa hle bawk a, Dampa bial kawng a chhe em em bawk a ni, a ti a. Dampa bial mipuite hian ZPM sorkar hian engmah tak tak an ti thei lo tih hria se ka duh a. Dampa bial mipuite hian Dr. R. Lalthangliana, mithiam leh Central lamah pawh a ngaihna hre tur, he bial harsatna tak tak lak aṭanga phurchhuak thei tur an thlan tlin hi a ṭul hle a ni, a ti bawk.
MNF Thalai President chuan, Hmunphiah leh sawhthing lei leh hralh chungchangah pawh ZPM sorkar a hlawhchham chiang hle a. Sawhthing leinaah vaibelchhe 4 chuang sum a chingpen thute kan hria a, chhui chiangin thil dik lo titu hrem thuai se kan duh hle a. Hmunphiah chungchangah pawh kuthnathawktute an tibeidawng hneh hle a, Mamit district hmunphiah Farmers ten Sorkar rate in hmunphiah man an tel lo nasa a, a pawi tak zet zet a ni, a ti bawk.
