Mizoram hmalam hun tur atan BJP pawimawhna hi kan hmuh a ngai. Dr. K.Beichhua
BJP Mizoram chuan vawiin Thawhtan khan BJP Mizoram State Office, Mipui Rûn, Upper Republic-ah Karthar Inhlanna leh Political Session neiin, Johny Lalthanpuia, State Media Convener-in inkhawm a kaihruai a, Dr. K Beichhua, MLA & State President-in thu a sawi.
Dr. K. Beichhua chuan, "India ram hmun nga a ṭhena hmun li (5/4) ah BJP chuan Sorkarna kan siam tawh a, tunah hian hmalam panin kan la kal mek zel a ni," a ti.
Pu Beichhua chuan, "India ram Prime Minister Pu Narendra Modi hian Pu Atal Bihari Vajpayee-in India ram PM lo ni tawh hmalak duh dan leh tum dan, Vajpayee Legacy chu a chhunzawm zel a, vawiin ah hian a hlawhtlinna kan hmu zel bawk a ni, a ti.
Pu Vajpayee khan Tele-communication hi India ram hmasawnna atan a pawimawh hle tih a hria a, chutiang tak chuan vawiin ah chuan India ram hmun kilkhawr ber thlengin inbiakpawhna chuan khaw kilkhawr ber te pawh a thleng thei ta vek a, hei hian kawng hrang hrangin India mipui tan awlsamna a thlen a a chhawrtu te kan ni hi a lawmawm hle a ni, a ti.
Dr. K. Beichhua chuan sawi chhunzawmin, "PM Modi Sorkar kum 12 chhunga PM Pu Modi-a Cabinet Minister leh Union Minister-te ah hian Corruption a vang a, hming chhia an awm lova, hei hi chhinchhiah tlak tak a ni awm e. Hei vang ringawt pawh hian Mizoram mipuite, NGO-te leh pawl hrang hrang te, Kohhran hrang hrang te pawh hian kan kalphung te hi min zir chiang zel sela, Mizoram hmalam hun tur atan BJP pawimawhna hi kan hmuh a ngai a ni," a ti bawk.
