An sawi letling hlauha ZPM sorkar an kal hi a makin a vanduai thlak hle. James Thanghmingmawia MPCC Cell Chairman
Vawiin June 8, 2026 Thawhtanni hian Mizoram Pradesh Congress Committee chuan Bhavan-ah Political Session kan nei a, he hunah hian James Thanghmingmawia, Chairman, Environment Protection & Social Justice Cell chuan thu sawiin "ZPM te hi an sorkar hma a, an thutiam an tihhlawhtlin loh zia leh an sawi letling hlauha an kal dan hi a makin a vanduai thlak hle a ni." a ti.
24 October 2023 khan ZPM MLA candidate te chu a huhoa thutiam lak tir an ni a, chuta an thutiam rual chu, "Chhung leh khat, mahni mi leh sa leh midang tute pawh duhsak bikna lak ah ka in thiar fihlim ang" tih a ni a. Minister zahawm tak K.Sapdanga hian an sorkar hma 7 August 2023 khan ZPM hi thuneia mipui ten an siam chuan contract hna chu contractor in an thawk leh ang, tiin a sawi bawk a ni. An sorkar hma a, an thutiam leh an thusawi ka han tarlan chhun te mai pawh hi an tihhlawhtlin loh zia leh an sawi letling hlauh a an kal dan hi a makin a vanduai thlak hle a ni, a ti.
Chhung leh khat, mahni mi leh sa leh midang tu pawh duhsak bikna lak a inthiar fihlim tur ang a, Zoram mipui laka thutiam sawi rual tute khan, duhsak bik te hnen a contract hna an pek theih nan sawrkar lo awm tawh zawng zawng ten an la tih ngai miah loh ang in 6 June 2024 a Council of Minister thukhawm chuan contract tender chhanna chu 5% below leh 10% above a chhan khapna a pawmta hmiah mai a, chu Council of ministers thurel bawhzui nan chuan 15 July 2024 khan he khapna hi Commissioner & Secretary to Govt of Mizoram, Finance Dept.in notification a chhuah ta a ni, a ti bawk.
Hetiang anga duhsak bik ten contract hna duh tawka in pekna tur hian tu sorkar mah in council of Minister meeting-ah an la rel ngai lo reng reng a ni. Hetiang ang khapna hi MNF sorkar hmasa khan 24 August 2007 khan PWD Secretary hmingin an lo siam tawh a, he order hi Congress sorkar khan tha lo tiin kum 2013 khan kan sut ta a. Tuna ZPM sorkar hian chu kalphung tha lo tak fair compettition nuai bo a, duhsak zawng te contract hna duh tawka inpek theihna chu rawn thar thawh leh a, an mi leh sa leh an chhungte vulh an tum ta a ni, a ti.
He khapna ZPM sorkarin a siam leh hi kan ram tan a that lo em avangin Pu Ruata Sailo chuan High Court-ah khingin High Court chuan 20 May 2026 khan he khapna hi a ti tawp lai lawk ta a, chu mi a vang chuan 26 May 2026 khan a hmaa an order tih tawp lai lawkna tur order an siam ve ta chuk chuk a. HC order vang ni ngeia ngaih turin Home deptt. a hna tender chhuah tawh thenkhat chu cancelled a ni nghe nghe a ni, a ti bawk.
ZPM te hian an sawrkar hma khan Restricted Tender hi an sawisel nasa in Pu Lalduhawma phei chuan Assembly House ah te khan nasa takin a dodal thin a. 24 August 2023 a ZPM campaign kick off na ah phei chuan Restricted Tender an tih ve loh ringawt hian kan sum dinhmun chu nasa takin a siam tha nghal ang, tiin a sawi a ni, a ti a. Dt.17.04.2024 khan ZPM sorkar hian hna hrang hrang 76, cheng vaibelchhe 629.17 man chu a hlawmin Restricted Tender blanket Approval in an duhsak zawng te an pe vek a. Dt.22.10.2025 khan hna chi hrang hrang 41,cheng vaibelchhe 328 man lai chu Restricted blanket Approval tho vin an duhsak bik te an pe leh vek bawk a. Social Welfare, Women & Child Development Dept.hnuai ah Dt 18.09.2025 khan SC Hostel pathum a vaiin cheng vaibelchhe 150.97 man chu Restricted Tender hmang a duhsak zawng te pek a ni, a ti bawk.
