CM meuh thusawi bawhzuina a awm lo chu CM zah lohna niin ka hria. Dr. Mala
June ni 3 & 4, 2026 hian Dr.Lalmalsawma Nghaka, MPCC Treasurer leh AMC Corporator ni bawk chuan Champhai District chhunga khaw hrang hrang a tlawh a. Vawiin June 4 hian Hnahlanah hun hmangin, Champhai North Congress Block-II huamchhunga Congress worker te nen Hnahlan VO Hall ah inkawmhona hun ṭha tak an nei.
Congress worker te hmaah thusawiin Dr.Lalmalsawma Nghaka chuan, Congress Party chuan mipuite dah pawimawh tak takna leh mipuite lainatna thinlung nen kan policy tur kan duang mek. Congress chuan duhsakna uchuak leh a thei fal ten sum siam tumna ringawt avanga Restricted Tender leh Departmental works leh Work Supervisor phuahchhawp te hi kan duh ve lova, kan hnawl dawn a ni, a ti.
Health Care chungchang sawiin Dr.Lalmalsawma Nghaka chuan, Health Care pawh mi harsa ber te leh mi nawlpui banphak turin kan hnûk hniam dawn a, Health Care pawh langtlang tak, bih chian ngam, zep ruk kual ngai thil awm lovin kan kalpui dawn a ni. Health Care hi sumdawn nan nilo, mipuite tan a chhenfak awmin kan siam dawn a ni, a ti bawk.
Chief Minister Pu Lalduhoma’n Ngur-Vapar chunga tui khuah tur, Sea Plane pawh ṭum thei tur leh Champhai leh a chhehvel khua te pawh tuia chawm thei tura a sawina hmun tlawhin, Dr Lalmalsawma Nghaka chuan, kum 2 hnuah pawh kan CM thusawi bawhzuina hmuh tur a la awm lo chu lungchhiatthlak a tih thu a sawi a. Ruahsur miah lo mahse Champhai leh a chhevel khua te kum 2 chhung tuia an hnianghnar theihna tur Project ropui tak CM meuh pawhin tihtakzeta a sawi chhuah tawh chu bawngtuthlawh cheh khat pawh chehna hnuhma a la awm lo tih kan hmu a. Mizoram CM meuh thusawi bawhzuina a awm lo chu CM zah lohna niin ka hria, a ti.
