Gauhati High Court Chief Justice in MSLSA te Green Mizoram Day a hman pui. Green Mizoram Day hman a nih atangin thingtiak nuai 46 chuang phun a nih tawh
Aizawl; 11th June, 2026: Vawiin khan Mizoram State Legal Services Authority (MSLSA) chuan Green Mizoram Day pualin Gauhati High Court Office peng, MINECO, Khatla-ah thing phun uar a tulzia inzirtirna hun an hmang. He programme-ah hian Justice Ashutosh Kumar, Chief Justice, Gauhati Court leh Patron-in-Chief, Mizoram State Legal Services Authority ni bawk chu a hmanpui.
Justice Ashutosh Kumar, Chief Justice, Gauhati High Court chuan Green Mizoram Day chu kum 1998 khan Green Aizawl Day tia hman tan a nih thu leh kum 1999 atangin June ni 11 hi kum tinin Green Mizoram Day tia hman chhoh tan a nih thu a sawi a. Green Mizoram Day hman a nih atangin thingtiak nuai 46 chuang zet hmun hrang hrangah phun a nih tawh thu a sawi bawk. Kumina Green Mizoram Day thupui “Trees are green gold, The roots of all life” atana thlan a ni hi tha a tih thu sawiin; thingte hi kan tan an hlu hle a, lei hnuaia tui khawltu, lei min tur vengtu leh nunna atana pawimawh tak boruak thianghlim pe chhuaktu an nih thu te a sawi a. Mizoram chu India ram bung hrang hrang zingah ram zimte ni mah se, ramngaw, nungcha leh sik leh sa thatna hmun a ni a, boruak a nuamin a thiang hle a; thing leh mau, nungcha leh ramngaw te hi humhalh tlat a tul a ni, a ti.
Justice Ashutosh Kumar hian Gauhati High Court, Aizawl Bench Office bulah Herhse a phun nghal a. MSLSA buatsaih Green Mizoram Day hmanna programme hi Vincent Lalrokima, MJS, Member Secretary, Mizoram State Legal Services Authority chuan a kaihruai a. He hunah hian Mizoram Judicial Officer te, Law Department Officer te, Gauhati High court, Aizawl Bench Officer te, Mizoram Bar Association Member te leh Law College Zirlai te an tel kim hle. Legal Services Authority staff ten Ainawn vengah thingtiak engemaw zat an phun nghal.
Justice Michael Zothankhuma, Judge, Judge-in-Charge, Administration Department (JAD), Gauhati High Court leh Executive Chairman, Assam State Legal Services Authority leh Justice Sanjeev Kumar Sharma, Judge, Gauhati High Court ten an hmanpui bawk. Kumin Green Mizoram Day thupui chu “Thing hi rangkachak anga hlu, Nunna tinreng bul a ni” tih a ni a. He ni pual hian khuallian leh official dang ten thingtiak an phun a ni.
