Kan intiamna te hi a tak bik a ni tih ka sawi duh. Kan Corporator te pawh mipui pan tlak an ni dawn. Dr. Mala
Vawiin April Ni 17, 2026 Zirtawpni khan Mizoram Pradesh Congress Committee chuan, Mipui thlavang hauhna leh AMC Election Campaign kharna hun Vanapa Hall kawtah an hmang a, MPCC Treasurer Dr. Lalmalsawma Nghaka chuan, AMC Ward no XIX(19)-a MPCC Candidate ni bawk chuan thu sawiin, Mizoram-ah leh Aizawl, Zofate Jerusalem-ah hian engnge pawimawh ber kan tih chuan, dan hnuaiah angkhata dikna chanvo kan neih hi a ni, a ti.
Dr. Mala chuan, dan reng reng hi mipuite dinhmun thlir chunga siam tur a ni a. AMC ah hian Property Tax te pawh hi mipuite phurrit ni lovin, chhawk zangkhaina a ni tur a ni, a ti a. Heng te hi mipuite phurrit chhawk zangkhai tur zawngin Congress party chuan dan kan siam dawn a, Congress party hi kan sorkar chuan mipui ban phak kan ni dawn a, kan Corporator te pawh mipui pan tlak an ni dawn a ni, a ti bawk.
Dr. Mala chuan, vawiin-ah hian Congress party candiate te hi mi naran te te kan ni a, chutiang chu ni mah ila mipui leh Aizawl khawpui tan theihtawp kan chhuah dawn a, kan intiamna te hi a tak bik a ni tih ka sawi duh a. Aizawl khawpui changkang zawk, nuam zawk, ralmuang zawk kan neih theih nan, Congress party candidate te lo vote vek turin Aizawl mipuite ka sawm vek che u a ni, a ti bawk.
