Lengpui ram IAF te hnena hralhna CBI chhuitir ZPM-in an ngam lo. MNF Legal Board
Vawiin Ni 17.4.2026 khan MNF Legal Board chuan an Vice Chairman Lalpianfela Chawngthu hovin Aizawl Press Club-ah thuthar lakhawmtute an kawm a, Lengpui Land Scam CBI chhuitir tura MNF party in kan nawrna, ZPM sorkarin a bawhzui danah CBI hnena chhui phalna consent an pekna notification tih chhuah bak hmalakna mumal engmah zawh chhuah tur a awm lo a, ZPM sorkar hian chhuitir a tum tak tak lo va, a chhuitir ngam lo tih a chiang tawh, a ti.
Lalpianfela chuan, February ni 5, 2026 khan MNF chuan Mizoram Sorkar Chief Vigilance Officer/Chief Secretary hnenah Complaint – Lengpui ram IAF hnena hralh chungchang CBI chhuitir tura ngenna kan thehlut a. He complaint copy hi DGP pawh pek a ni bawk. Complaint thehluh a nih thu hi chanchinbu mite hnenah kan puangzar nghal bawk a ni. Hemi ni vek hian MPCC te chuan CBI hnenah he thil kaihhnawihah vek hian FIR an thehlut bawk a ni, a ti.
An complaint thehluh bawhzui hian ZPM Sorkar chuan February ni 23, 2026 khan CBI hnena Lengpui ram chhui tura phalna consent an pek thu Notification an tichhuak a (Annexure – 1), he notification ah hian CBI Director chu copy to Sl. No. 6 ah dah a ni ve a ni. Tin, March ni 6, 2926 khan MNF MLA zahawm tak Dr. Lalthangliana Resolution putluh chu tlema siam danglamin Mizoram Legislative Assembly “Indian Air Force (IAF) in Lengpui ram an lei dan chungchangah dan bawhchhiatna nasa tak leh corruption a awm ngei ni a lang hi Mizoram mipui duh dan leh beisei ang ngeiin Central Bureau of Investigation (CBI)-in a chhui thuai theihnan Mizoram sorkarin rang taka bawhzuiin hma la rawh se,” tiin a lo pawm tawh bawk a ni, a ti.
An complaint thehluh hi kan bawhzui zel a, March ni 25 khan eng chen nge sorkarin a kalpui tawh tih zawtfiah turin Chief Secretary hmuh an tum tih sawiin, Lalpianfela chuan anni lam hian Vigilance dept lamah kal turin thurawn min lo pe a. Tichuan, hemi ni tlai lamah Vigilance Secretary hi kan hmu a. Complainant kan nih ang a Notification Fenruary ni 23, 20206 a an chhuah copy pawh pek kan nih ve loh thu leh a copy hi min pe ve turin kan dil a. Tin, kan complaint copy hi CBI lamah thawn thlak a nih leh nih loh kan zawt a, an thawn thla a nih chuan an thawn thlakna lehkha – Lengpui ram IAF hnena hralh chungchang chhuitir tura an ngenna te kan dil nghal bawk a. Vigilance Secretary Office lam hian an thawn thlak ngei thu leh chung lehkha copy te chu a tuk March ni 26, 2026 ah min pek tur thu an sawi a. Mahse, vawiin thlen hian kan dawng ta lo a ni, a ti.
MNF Legal Board Vice Chairman chuan, hemi hnu lama kan thil hriat zui ni ta zel chu RTI hmanga zawhna, “Lengpui ram IAF hnena hralh leh lei dan chungchangah CBI chhuitir tumna a awm em? A awm anih chuan CBI hnena lehkha theh luh copy min pe thei ang em?” tih an chhannaah chuan CBI chhuitir tumna a awm thu leh CBI hnena an lehkha thehluh chu February ni 23, 2026 a CBI hnena Consent an pekna notification chauh chu an lehkha pek tur neih chu a ni ta a ni, a ti bawk.
MNF Legal Board ten mipuite hnena kan sawi duh chu ZPM sorkar hian verther takin Lengpui ram IAF hnenah an hralh chungchangah hian bum min tum a ni tih hi a ni, a ti a. CBI chhuitir tumna tak tak an nei lo a, an ngam bawk hek lo a ni tih hi mipuite hriattir kan duh a ni. CBI hnena consent an pekna notification ringawt hi CBI chhuitir tura thu tling a ni phak lo a. MNF ten CVO hnena complaint kan thehluh hi CBI Director hnenah an thawn thlak bakah chhuitir tura ngenna - forwarding mumal an siam tur a ni. MNF chuan Lengpui ram hi Mizoram Legislative Assembly-in resolution a lo pass tawh ang ngeia CBI in an chhui ngei theihnan hma kan la chhunzawm zel dawn bawk a ni, a ti bawk.
