Mipui sum hi Party mala lo intihtheihpuina chi a ni lo. K. Hrahmo MLA
Vawiin-a BJP Mizoram Friday Political Session, BJP Mizoram State Office, Mipui Rûn, Upper Republic-ah neih-ah MLA & State Core Group Member K. Hrahmo chuan thu sawiin, "India rama Women's Reservation Bill pass tawh hman mai tura sawi ho mek hi hmeichhia te chawikanna hmanrua pawimawh tak a nih avangin, Modi-a kaihhruai Sorkar chuan a pass ngei a dawn a, hemi denchhena lawmthu sawi nan, AMC Area-a hmeichhiate chuan BJP vote an tum phah dawn niin kan hria a, a lawmawm hle a ni," a ti.
K. Hrahmo chuan, "Tunlai hian Aizawl khawpui veng hrang hrangah kawng siam hna thawh mek a ni a, Petrol leh Diesel man mipuite'n kan pek sum tling khawm aṭangin Aizawl khawpui kawng hi mipui suma siam a ni tih hi ka sawi duh a. Hetih mek lai hian, keini Siaha District-in Oil aṭanga Tax kan pek hi Rs. 8.7 Crore chuang a ni a, nimahsela inthlan kan hnaih loh vang nge ni? kan kawngpui erawh a chhiat ngaiin a chhe reng a. Hetiang hi thil thleng mek a nih avang hian AMC Election lo awm tur atana ZPM Party-in hamṭhatna an beisei vang a nih a rinawm hle a. Chuvangin mipui sum hi Party mala lo intihtheihpuina chi a ni lo a ni," a ti bawk.
K. Hrahmo chuan sawi chhunzawmin, "Congress Party hian an hna ber chu BJP sawichhiat a ni a, Development Policy an nei reng reng lo a ni. NLUP an tih pawh kha Central-a Congress lal laia an lo pass tawh, BJP Sorkarin an Cancel sak loh mai mai kha a ni a, NLUP ṭha mi eng ang paw'n zuar leh pawh ni se, Central Sorkar BJP Modi kaihhruai hian chatuanin a pe dawn tawh lo a. Chuvangin, Mizorama Congress Party-te tan chuan beisei tur a bo hle a, mipuite pawh NLUP ṭha mi lak ah fimkhur turin ka ngen che u a. Chuvangin tun hun hi BJP hun a ni mek tih kan hriat a ṭul hle a, BJP chuan Development hi kan thupui ber a ni," a ti bawk.
