BJP Sorkarna State-ah Development a thleng nasa, Sorkar awmze nei, MP thil tithei neih ve hi kan phu. Dr. K. Beichhua
Vawiin June 8, 2026 (Thawhṭanni) khan BJP Mizoram chuan Party chhung inkhawm neiin, State Presient leh MLA Dr. K. Beichhua chuan thu a sawi a. "India ramah BJP leh a thawhpui NDA, Pu Modi kaihhruaina hnuaiah Kum 12 chhungin Union Minister zingah eirukna chungchangah hmingchhiatna nei tumah an la awm lo a, hemi aṭang hian BJP Sorkar dik zia leh ṭhat zia a lang chiang hle a ni. Chutiang a nih avang chuan India ramin nasa takin hma a sawn phah a, a rah chhuah chu Infrastructure Development ṭha tak tak kan hmuh hi a niin, a lawmawm hle a ni," a ti.
Dr. K. Beichhua chuan, "BJP chuan Corruption hi a zung aṭangin an phawi zel a, Direct Benefit Transfer kaltlangin eirukna tamtak awm thin an ti bo a, kawng laka sum bo awm lo turin Sorkar chuan hma a la a, hei hian sum a nih dan tur ni lova lo kal ṭhin chu a tih tlem phah hle a, sum tamtak hemi a vang hian Sorkar chuan a hum theih phah a ni. Eirukna do na kawngah CBI khawih theih piah lamah, Enforcement Directorate Central Agency, (Ministry of Finance) hnuaia awm te'n hna an thawk tha hle a, tunhnai mai ah pawh Mizoram leh Myanmar-a Kuhva raha sumdawnna 'smuggling' aṭangin Rs. 970 crore man an man tawh a. Hei hi 'e-way bill' dik lo hmanga sumdawnna thil a nih avangin a serious em em a ni. Hengte a nih avang hian buaina lian zawk a kan tel loh nan Mizoram mipuite pawh kan fimkhur a pawimawh hle a ni," a ti.
Dr. Beichhua chuan, "Mizoram tan a Development pawt chhuak tak tak thei tur chu BJP kan ni a, a chhan chu Central-ah BJP kaihhruai sorkar kan hrawn mek a. BJP Sorkarna State-ah Development nasa tak a thleng a, chutiang hun chu a nghahhlelh awm ve hle a ni. Sorkar awmze nei, MP thil tithei neih ve hi Mizoram mipuite hian kan phu a. Chuvangin Politics-a kan awm chhan hi hmasawnna a nih avangin hmasawnna kan neihna kawng pawimawh tak BJP ṭang kan belh a ngai a ni. Chuvangin Mizoram mipui te hian BJP nihna dik tak hria a, hmasawnna kan beisei min thlensak thei tu a ni tih kan hriat a ngai a ni," a ti bawk.
