Harsatna leh beihna tam tak kâra ZPM Rajya Sabha MP candidate-in scrutiny a paltlang avangin ZPM Party an lawm
Vawiin-a Zoram People's Movement (ZPM) thuchhuah chuan, ZPM party-in Mizoram aiawh Rajya Sabha Member of Parliament thlanna neih tura candidate atana a puan K. Laltluangkima'n harsatna leh beihna tam tak kâra ṭha taka endikna '(scrutiny)' a paltlang chu lawmawm an tih thu an sawi.
ZPM thuchhuah chuan, Vawiin June 9.2026 chawhma dar 11.00 khan June ni 18, 2026-a Mizoram aiawh Rajya Sabha Member of Parliament pakhat thlan turah Returning Officer Zothansanga Ralte, Commissioner & Secretary, Mizoram Legislative Assembly office-ah candidate te 'nomination paper' leh 'documents' endikna '(scrutiny)' neih a ni a. 'Scrutiny' neihah hian ZPM candidate K. Laltluangkima, Mission Veng chu khin thlak ni lovin, RO hmaah 'scrutiny' hi a paltlang a ni.
ZPM party thuchhuah chuan, an candidate hi kawng hrang hrangah rem leh rem lova hêk thlak tumna a awm a, nimin 08.06.2026 (Thawhṭanni) aṭang tawhin a khingpui party ukil ten a 'nomination document'-te Assembly lamah an dil tawh a. Hetianga a dik lohna awm lo, hêk tlak theihna awm lo a ni chunga nasa taka beih a tâwk hi pawi kan ti a ni, an ti a. K. Laltluangkima hian endiknaah hian RO hmaah a Birth Certificate leh Passport thlenga pharhin fiahna hi a paltlang tih ZPM Party thuchhuah chuan a sawi bawk a ni.
Mizoram Rajya Sabha MP hi June ni 18, 2026 zing dar 9 aṭanga tlai dar 4 thleng Assembly House building-ah Mizoram MLA ten vote thlakin an thlang dawn a. June nin18, 2026 tlai dar 5 hian vote chhiar a ni ang. MP thlanna atan hian ZPM party chuan MLA 27 neiin, tling tura ngaih a ni a. MNF hian MLA 10 an nei a, BJP MLA 2 leh INC MLA 1 te a ni.
